ភ្នំពេញ៖ នាយករដ្ឋមន្ត្រីកម្ពុជា សម្តេចតេជោ ហ៊ុន សែន និងប្រធានាធិបតីទីម័រខាងកើត លោក ចូសេ រ៉ាម៉ូស ហ័រតា នារសៀលថ្ងៃទី២០ ខែតុលា ឆ្នាំ២០២២ បានអញ្ជើញធ្វើជាអធិបតីដ៏ខ្ពង់ខ្ពស់ក្នុងការចុះហត្ថលេខាលើអនុស្សរណៈនៃយោគយល់គ្នាស្តីពីការធ្វើពាណិជ្ជកម្មអង្ករ និងការចុះហត្ថលេខាលើកិច្ចព្រមព្រៀងស្តីពីសេវាកម្មដឹកជញ្ជូនផ្លូវអាកាសរវាងប្រទេសទាំងពីរ។

រដ្ឋមន្ត្រីក្រសួងពាណិជ្ជកម្ម លោក ប៉ាន សូរសក្តិ និងរដ្ឋមន្ត្រីការបរទេស និងសហប្រតិបត្តិការនៃសាធារណរដ្ឋប្រជាធិបតេយ្យទីម័រខាងកើត លោកស្រី Adalijiza Albertina Xavier Reis Magno ចុះហត្ថលេខារួមគ្នាលើអនុស្សរណៈនៃយោគយល់គ្នាស្តីពីការធ្វើពាណិជ្ជកម្មអង្ករ។

ជាបន្ទាប់នេះ លោកស្រី រដ្ឋមន្ត្រីការបរទេស និងសហប្រតិបត្តិការនៃសាធារណរដ្ឋប្រជាធិបតេយ្យទីម័រខាងកើត ក៏បន្តចុះហត្ថលេខាលើកិច្ចព្រមព្រៀងស្តីពីសេវាកម្មដឹកជញ្ជូនផ្លូវអាកាសរវាងរដ្ឋាភិបាលប្រទេសទាំងពីរ ជាមួយរដ្ឋលេខាធិការដ្ឋានអាកាសចរស៊ីវិល លោក ម៉ៅ ហាវណ្ណាល់។

គូសបញ្ជាក់ថា ប្រធានាធិបតីទីម័រខាងកើត លោក ចូសេ រ៉ាម៉ូស ហ័រតា មកបំពេញទស្សនកិច្ចផ្លូវរដ្ឋនៅកម្ពុជាពីថ្ងៃទី១៩-២២ ខែតុលា ឆ្នាំ២០២២៕

^{PHOTO: KOK KY}